इलाम, १४ साउनः इलाममा गत आवमा ट्राफिक नियम मिच्ने १३ हजार ६१० सवारीसाधन कारवाहीमा परेका छन् ।जिल्ला ट्राफिक प्रहरी कार्यालय इलामका अनुसार सवारी कारवाहीबाट रु.८० लाख १४ हजार पाँच सय राजश्व उठेको छ ।
अघिल्लोको तुलनामा आव ०७५÷०७६ मा कारवाहीमा पर्ने सवारीसाधनको संख्या घटेको छ । आव ०७४÷०७५ मा जम्मा १४ हजार ९८६ सवारीसाधन कारवाहीमा परेका थिए । यो वर्ष नियमविपरीत चलेका ४४० वस, १ हजार ९०४ ट्रक, जीप ५ हजार ४९५, पाँच हजार १२२ मोटरसाईकल र ट्र्याक्टर ६४९ गरेर तेह्र हजार ६१० सवारीसाधन कारवाहीमा परेका हुन् ।
कागजात नभएका, बढी भार बोक्ने, तीव्र गतिमा हाँक्ने, मापसे सेवनजस्ता ट्राफिक नियम उल्लङ्घन गर्ने सवारी चालकलाई कारवाही गर्ने गरिएको कार्यालय प्रमुख प्रहरी नायब निरीक्षक दिलिप कुमार चौधरीले बताउनुभयो ।
मापसेको संख्या दोव्वर
इलाममा गत आर्थिक वर्षमा अघिल्लो आर्थिक वर्षको तुलनामा मादक पदार्थ सेवन (मापसे) गरेर सवारिसाधन चलाउनेको संख्या दोव्वर भन्दा वढी भएको छ । गत अर्थिक वर्षमा मापसेमा ३१९ जना कारबाहीमा परेका थिए भने यो आर्थिक वर्षमा ८४० जनालाई जिल्ला ट्राफिक कार्यालयले कारबाहीगरेको छ ।
दुर्घटनाको संख्या घट्यो, मृतकको संख्या वढ्यो
इलाममा गत आर्थिक वर्षमा १८ वटा सवारी दुर्घटना भए जसबाट ९ जनाको मृत्यु भयो । मृत्यु हुनेमा ८ जना पुरुष र १ जना महिलाको मृत्यु भएको थियो । सवारी दुर्घटनामा परेर १० जना सख्त घाइते र ३४ जना सामान्य घाइते भएका छन् । अघिललो आर्थिक वर्षमा २५ सवारी साधनको दुर्घटना भएको थियो जसबाट ७ जनाको मृत्यु भएको थियो ।