इलाम, २४ फागुनः इलाम नगरपालिका भित्रका पाँचवटा सडकहरु स्तरोन्नति गर्नका लागि एक एक करोड रुपैयाँका दरले खर्च गर्नेगरि इलाम नगरपालिकाको नगर कार्यपालिकाले रकम बिनियोजन गरेको छ । नगरपालिकाको फागुन २३ गते बसेको बैठकले सो रकम बिनियोजन गरेको हो । सोही बैठकले पुवाखोला चिन्तेसाँघु खानेपानी आयोजनाका लागि दुई करोड सात लाख २८ हजार रुपैयाँ बिनियोजन गरेको छ ।
नगरप्रमुख महेश बस्नेतको अध्यक्षतामा बसेको नगर कार्यपालिकाको बैठकले वडा नम्बर ८ मा पर्ने तिल्केनीदेखि माईखोलाको बज्रदेवीसम्मको सडकलाई एक करोड रुपैयाँ, वडा नम्बर ९ को भञ्जाङदेखि भाङ्गटार हुँदै वडा नम्बर ११ सोयाक बेलासे पुग्ने फाष्ट ट्¥याक सडकको सोयाक खण्डलाई एक करोड रुपैयाँ, वडा नम्बर २ को रिब्स स्कुलदेखि र ५ को सुम्बेकसम्मको सडकलाई एक करोड रुपैयाँ बिनियोजन गरेको हो । त्यस्तै वडा नम्बर १ साँखेजुङको मिलगोलाइदेखि वडा नम्बर ३ पुवामझुवाको विणापानी स्कुलसम्म सडकको पुवामझुवा खण्डलाई एक करोड रुपैयाँ तथा वडा नम्बर ७ को रत्नचोकदेखि वडा नम्बर ९ इन्टेक हुँदै वडा नम्बर १२ को साङ्गरुम्वा सडकको वडा नं। ९ र १२ का लागि एक करोड बिनियोजन गर्ने निर्णय गरेको हो ।
सोही बैठकले तीनवटा विद्यालयमा खानेपानी तथा स्वास्थ्य र सरसफाई सुविधायुक्त शौचालय निर्माण का लागि सात सात लाख रुपैयाँको दरले खर्च गर्ने निर्णय पनि गरेको छ । वडा नम्बर १० गोदकको पूर्णस्मारक मावि, वडा नं। १२ को साङ्गरुम्वा मावि, र वडा नम्बर ४ माईपोखरी जस्वीरेको बालमण्डल माविमा शौचालय बनाइने भएको हो ।
त्यसैगरी इलाम नगरपालिकाको आर्थिक वर्ष २०७५/०७६ को सौर्य ऊर्जा प्रविधि जडान कार्यक्रम अन्तर्गत वार्ड नम्बर ११ सोयाकको निर्फोकमा सौर्य ऊर्जाबाट पानी तानेर सिञ्चाई सुविधा उपलब्ध गराउने गरी छ लाख ४८ हजार रुपैयाँ खर्च गर्ने निर्णय पनि कार्यपालिका बैठकले गरेको नगरपालिकाका प्रवक्ता तथा वडा नम्बर ५ का वडाध्यक्ष ठाकुर श्रेष्ठले जानकारी दिएका छन् ।