इलाम, २९ जेठ । इलामको विभिन्न ठाउँमा उत्पादन हुँदै आएको तरकारी बारीमानै कुहिएको छ । इलामका तरकारी कृषकहरु तरकारी विक्री नभए पछि मारमा परेका हुन ।
विश्वभरि नै महामारीको रुपमा फैलिएको कोरोना भाइरस (कोभिड १९) का कारण देशमा लकडाउन भए पछि इलामका किसानले आफुले उत्पादन गरेको तरकारी विक्री गर्न नपाएका हुन । कृषकको वारीमा अहिले वन्दा कोपी, काउली, मुला लगायतका तरकारी वाली बारीमा नै कुहिएको छ ।
लकडाउनको समयमा आफुहरुले लगेर विक्री गर्ने अवस्था पनि नरहेको र स्थानीय सरकारले कुनै चासो नदेखाएकोले आफुहरु ठूलो मारमा परेको इलाम नगरपालिका ४ धारापानीका किसान विनोद रिजाल वताउँछन् ।
इलामा व्यवसायिक तरकारी खेतिगर्ने किसान धेरै छन् । तर अहिले देशमा भएको लकडाउनको कारण तरकारी नविकेपछि वाली कुहिएर वारीमै नष्ट भएको छ । कतिपय कृषकले त वाली नै नलागाएको पनि वताउँछन् । यता इलामको स्थानीय वजारमा वाहिरबाट तरकारी आएको तर स्थानीय उत्पदनलाई प्राथामिकता नदिएको पनि इलाम नगरपालिका ७ का कृषक वुद्धिमान राईको गुनासो छ ।
इलामका अधिकांश ग्रामीण भेगका किसानहरुले तरकारी खेती गर्दै आएका थिए । उनीहरुको तरकारी इलाममा रहेका स्थानीय वजार लगायत झापा, विराटनगर र भारतको पश्चिम वंगालको सिलिगुडीमा सम्म विक्री हुँदै आएको थियो ।
