२०८३ असार १९ गते , शुक्रबार
भद्रपुर–गलगलिया रेलमार्गको अन्तिम स्थान सर्वे जारी, आरटीआईमार्फत सार्वजनिक भयो प्रगति विवरण
भद्रपुर । नेपाल–भारत सीमा जोड्ने गलगलिया (भारत)–भद्रपुर– हल्दीबारीको काजलीबजारसम्म (नेपाल) रेलमार्गको फाइनल लोकेशन सर्वे (FLS) को काम अहिले पनि जारी रहेको छ। भारतीय रेलको निर्माण निकाय नर्थइस्ट फ्रन्टियर रेलवे (NFR Construction) ले सूचना अधिकार (RTI) अन्तर्गत दिएको जवाफमा उक्त जानकारी सार्वजनिक गरेको हो।
बच्चुराज बरुवालले दर्ता गरेको आरटीआई निवेदनको जवाफ दिँदै एनएफआरले २६ जुन २०२६ मा परियोजनाको हालसम्मको प्रगति सार्वजनिक गरेको हो। जवाफमा परियोजनाको फाइनल लोकेशन सर्वे स्वीकृत भई कार्यान्वयनमा रहेको, सर्वेका लागि जारी गरिएको लेटर अफ एक्सेप्टेन्स (LOA) को प्रतिलिपि उपलब्ध गराइएको तथा नवीनतम प्रगति प्रतिवेदन तयार भइरहेको उल्लेख गरिएको छ।
आरटीआई जवाफअनुसार सर्वे सम्पन्न भइसकेको छैन। त्यसैले Completion Report हाल उपलब्ध नभएको र Final Location Survey को काम प्रगतिमै रहेको जनाइएको छ।
यसअघि भारतीय रेल मन्त्रालयअन्तर्गत रेलवे बोर्डले ५ जुन २०२४ मा जारी गरेको स्वीकृति पत्रमार्फत नेपालसँगको रेल सम्पर्क विस्तारका लागि गलगलिया (भारत)–भद्रपुर–काजलीबजार(नेपाल) खण्डको १२.५ किलोमिटर नयाँ रेलमार्गको फाइनल लोकेशन सर्वे स्वीकृत गरेको थियो। उक्त सर्वेका लागि ३१.२५ लाख भारतीय रुपैयाँ बजेट विनियोजन गरिएको कागजातमा उल्लेख छ।
यो रेलमार्ग नेपाल–भारत सीमापार रेल सम्पर्क विस्तार गर्ने योजनाअन्तर्गत प्रस्तावित परियोजनामध्ये एक हो। सर्वे सम्पन्न भएपछि त्यसको प्रतिवेदनका आधारमा रेलमार्ग निर्माण गर्ने वा नगर्ने सम्बन्धमा आगामी निर्णय प्रक्रिया अघि बढ्नेछ। हाल भने परियोजना सर्वेक्षण चरणमै रहेको एनएफआरको आधिकारिक जवाफले पुष्टि गरेको छ।
0 comments:
Post a Comment