विदेशीले दिए, आफ्नाले दिएनन्, चन्दादाताले झुक्याएपछि ब्लड बैंक चलेन

चियाबारी डेक्स

इलाम २८ चैतः आउँदो वैशाख भित्रमा ब्लड बैंक सञ्चालन गर्ने तयारीमा रहेको इलाम रेडक्रस ‘चन्दा लेखाएर पैसा नदिने दाता’को कारण अप्ठ्यारोमा परेको छ । सञ्चालन खर्चको अभावको कारण कर्मचारी व्यवस्था गर्न नसक्ने अवस्थामा रहेको रेडक्रस दाताले दिनुपर्ने सातलाख रुपैंयाँ भन्दा बढि रकम नपाएपछि अप्ठ्यारोमा परेको हो ।

रेडक्रसका लेखापाल बसन्त तिम्सिनाका अनुसार जिल्लाकै नाम चलेका व्यापारी र समाजसेवीले पाँच वर्ष अघि लेखाएको चन्दा दिएका छैनन् । पटक पटक सम्झाउँदा पनि वेवास्ता गरेपछि अन्तिम पटक चन्दादातालाई स्मरण पत्र पठाउने तयारी गरेको तिम्सिनाले बताए ।

शाखाले पाँच वर्ष अघि २८ लाख २६ हजार रुपैंयाँको लागतमा अत्याधुनिक भवन निर्माण सम्पन्न गरेको थियो । रकम अभावको कारण सामाग्री खरिदमा समस्या झेलेको शाखाले जर्मन दुतावासको १४ लाख १८ हजार रुपैंयाँ अनुदानमा युरोपियन स्टेण्डरको सामाग्री खरिद गरेको छ । तिम्सिनाले भने ‘टर्की र भारतबाट सामाग्री काठमाडौं आइपुगेको छ ।’ रेडक्रस लक्जेम्वर्गले १० लाख ५० हजार र शाखाले करिब १३ लाख रुपैंयाँ खर्च गरेर सम्पुर्ण सामाग्री जुटाएको तिम्सिनाले बताए । तिम्सिनाले भने ‘सबै सामान इलाम ल्याएर जडान गर्न मात्र बाँकी छ ।’ जडान पछि कर्मचारी पाल्ने व्यवस्था नभएको कारण चन्दादातालाई स्मरण पत्र पठाउनु परेको हो । चन्दादाताले २५ हजार देखि ५ हजार ५ सय रुपैंयाँ सम्म चन्दा लेखाएका छन् । सार्वजनिक स्थलमा ‘शानका साथ’ चन्दा लेखाउनेहरुमा जिल्लाकै गन्ने मान्नेहरु रहेको शाखाले जनाएको छ ।

चन्दा रकम हातपरे ब्लड बैंक सञ्चालनका लागि स्थापना गरेको अक्षय कोषमा राखेर कर्मचारी पाल्ने योजना बनाएको उनले बताए । सो कोषमा अहिले ६ लाख रुपैंयाँ जम्मा भएको छ । लेखापढी व्यवसायी संघले प्रत्येक वर्ष ५० हजार रुपैंयाँ सहयोग गर्दै आएको छ ।

इलाममा मासिक २० युनिट (प्रिन्ट) रगत आवश्यक पर्छ । इलाममा गतिलो अस्पताल नहुँदा यहाँका बिरामी सोझै झापा, बिराटनगर, धरान वा भारत तर्फ जाने गरेकाले पनि आवश्यकता भन्दा कम देखिएको हो । इलाम अस्पतालमै राम्रो सेवा हुने हो भने रगतको माग अझ बढ्ने बताइन्छ । शाखाले इलाममा खपत नभएको ब्लड झापा, बिराटनगर, धरान लगायतका ब्लड बैंकलाई हस्तान्तरण गर्ने योजना सहित कुरा अघि बढाएको तिम्सिनाले बताए । अहिले सम्ममा इलाम नगरपालिका–८ मा भवन र सामाग्री जोहो भएको छ । ब्लड बैंक सञ्चालनमा आउन नसकेपछि अहिले इलामका २७५ महिला र १८७९ पुरुषले आकस्मिक रक्तदान गर्दै आएका छन् । इलाममा ब्लड बैंक नहँुदा रक्तदन कार्यक्रममा संकलन भएको रगत झापा, बिराटनगर, धरानका ब्लड बैंकमा पठाइने गरेको छ । इलामको ब्लड बैंकलाई ब्लड कलेक्सन सेन्टरका रुपमा विकास गर्ने योजना बनाएको रेडक्रसले जनाएको छ । झापा, बिराटनगर वा धरानको ब्लड बैंकले कर्मचारीको व्यवस्था गरिदिए सो सम्भव हुने इलाम रेडक्रसले जनाएको छ ।