हिन्दी फिल्मको निर्देशन गर्दै इलामकी सुचित्रा

इलाम, २८ भदौ । नेपालकै पहिलो महिला निर्देशकको पहिचान बनाएकी सुचित्रा श्रेष्ठले हिन्दी फिल्म निर्देशन गर्ने भएकी छिन् । चलचित्र निर्देशक समाजकी अध्यक्ष समेत रहेकी श्रेष्ठले नेपाल र भारत दुवै देशमा खिचिने तथा नेपाली र हिन्दी दुवै भाषामा निर्माण हुने फिल्म ‘चक्र’मा निर्देशन गर्ने भएकी हुन् । दुवै मुलुकका दर्शकलाई लक्षित गरी दुई भाषामा निर्माण हुने भएकाले भारतीय निर्देशक राजेश राजले सुचित्रासँग निर्देशनमा साझेदारी गरेका हुन् । नेपाली र हिन्दी दुई भाषीय समुदायमा खिचिने भएकाले दुवैतर्फको रहनसहन बुझ्न अनि संस्कृतिमा भिज्दै फिल्म निर्माणको लागि सहजता कायम गर्न दुई निर्देशक राखिएको निर्माण पक्षले बताएको छ । फिल्मको निर्माणमा समेत साझेदारी गरेकी निर्देशक सुचित्राले फिल्म बनाउने मुख्य निर्माता अनवर राज र कथा लेखक शशि कुमारसँग केही वर्ष अघिदेखि नै कुरा भए पनि बल्ल आएर काम शुरु हुन लागेको बताइन् । नेपाली फिल्म बजारमा बढ्दो हिन्दी फिल्मको प्रभाव नियाल्दै हिन्दी भाषाको फिल्म निर्देशनमा लागेको र उक्त फिल्मका लागि प्राविधिक र प्रविधि भने नेपालकै प्रयोग गर्ने सुचित्राको दाबी छ । उनका अनुसार फिल्मको ७५ प्रतिशत भारतको बिहारमा र २५ प्रतिशत नेपालमा छायाङ्कन हुनेछ । फिल्ममा नेपाल र भारत दुवै देशका कलाकार मुख्य भूमिकामा रहनेछन् भने मुख्य नायक नेपाली रहे हिरोइन भारतीय र मुख्य हिरोइन भारतीय रहेमा नेपालका हिरोलाई मौका दिइने सुचित्राको भनाइ छ । कलाकार छनोट छिट्टै गरिने पनि उनले जानकारी दिइन् । १२ करोड भारतीय रुपैयाँ बजेट बताइएको सो फिल्म आगामी लक्ष्मीपूजाको दिनबाट फ्लोरमा जानेछ ।

वि सं. २०२८ सालमा इलाम नगरपालिका १ स्थित प्रकाशपथमा वुबा कृष्णप्रसाद श्रेष्ठ र आमा लक्ष्मी श्रेष्ठको कोखबाट जन्मिएकी सुचित्रा श्रेष्ठले इलामकै विद्यालयहरु आदर्श प्रावि र आदर्श मावि इलामबाट आफ्नो प्राथमिक र माध्यमिक शिक्षा पुरा गरेकी हुन् । उच्च शिक्षाको लागि वि.सं.२०४६ सालमा काठमाडौं भासिएकी उनी पाटन क्याम्पसबाट आइएस्सीको अध्ययन सकिएपछि रत्नराज्यलक्ष्मी क्याम्पसमा पत्रकारिता पढ्न थालिन् । उनको फिल्मी करियरको ढोका तब खुल्यो जब उनको भेट निर्देशक रमेश शाहीसँग भयो । काठमाडौं बसेर रङ्ग पत्रकारिता गर्दै गरेकी सुचित्राको त्यतिनै बेला पढाईबाट फरक करियरको लागि बाटो मोडियो । बाल्यकालका स्मृतिहरु कसको लागि प्यारो नहोला र, सुचित्रा पनि आफ्नो बाल्यकाल बितेको इलामका चियाका बुट्टा र पाखाहरु अझै पनि स्मृतिमा रहेको चियाबारी दैनिकसँगको कुराकानीको क्रममा बताइन् । उनले भनिन्, ‘इलाम प्रतिको माया झल्काउन मसँग कुनै शब्द नै छैन । त्यही स्मृतिलाई ताजा गराउन म वर्षमा एकपटक इलाम आउछु ।’

वि.सं.२०४८ सालमै नेपाल टेलिभिजनको लागि स्मृति, अकल्पित जस्ता चर्चित टेलिचलचित्र बनाएर सफल निर्देशकमा आफुलाई दज्र्याएकी सुचित्राले आफ्नै लेखन तथा निर्देशनमा भाइटीका टेलिफिल्म बनाएपछि आफुलाई अब्बल लेखक पनि सावित गरिन् । उनले वि.सं.२०५५ सालमा काठमाडौंका तिर्थ श्रेष्ठसँग लगनगाँठो कसिन् । शिक्षासेवी तिर्थको रुचि फरक क्षेत्रमा भएपनि आफ्नो पतिबाट उनले चलचित्र क्षेत्रमा राम्रो सपोर्ट पाइरहेको बताइन् ।

उनका छोरा शाश्वत श्रेष्ठले पनि हालसम्म ३ वटा चलचित्रमा बालकलाकारको रुपमा आफ्नो अब्बल प्रस्तुति दिइसकेका छन् । सुचित्राले वि.सं.२०५८ सालमा निर्देशन गरेको ‘प्रेमयुद्ध’ नै पहिलो नेपाली महिलाले निर्देशन गरेको चलचित्र हो ।