इलाम, ३० असारः नेपाल सरकारले स्थानीय निकायहरुलाई तोकेको न्यूनतम सर्त समेत इलाम नगरपालिका इलामले पालना नगरेको स्थानीय विकास मन्त्रालयको स्थानीय निकाय वित्तीय आयोगले जनाएको छ । आयोगले बिहीबार सार्वजनिक गरेको देशभरका स्थानीय निकायहरुको नतिजामा इलाम नगरपालिका फेल भएको हो । यस विषयमा नगरपालिकालाई प्रश्न गर्दा नतिजा सर्वजनिक भएको सूचना अफुहरुले नपाएको वताइयो । फेल भएको कारण अब आउने आर्थिक बर्षमा इलाम नगरपालिकाले सर्तमा आधारित थप अनुदान नपाउने भएको छ । यससँगै इलाम नगरपालिकाभित्रको सुसासनमा प्रश्न उठ्नु स्वभाविक मानिएको छ । इलामसँगै काठमाडौं महानगरपालिका, टीकापुर, धुलिखेल, तुलसीपुर, त्रियुगा, लेखनाथ, सिरहा, जलेश्वर र मलङ्गवा नगरपालिका न्यूनतम सर्त पालना गर्न असफल भएका छन् । जिल्ला विकास समिति धनकुटा र बुटबल उपमहानगरपालिका उत्कृष्ट स्थानीय निकाय भएका छन् । स्थानीय निकाय वित्तीय आयोगको मूल्यांकनमा ८७ अंकका साथ धनकुटा उत्कृष्ट जिविस भएको हो । नगरपालिकातर्फ ९० अंकका साथ बुटवल उत्कृष्ट भएको हो । धनकुटा नगरपालिका र हेटौंडा उपमहानगरपालिका ८९ अंकका साथ दोस्रो भएका छन् भने ८८ अंक ल्याएर घोराही तेस्रो भएको छ । आर्थिक वर्ष २०७१÷७२ को न्यूनतम सर्त तथा कार्यसम्पादन मापनको नतिजा आयोगले बिहीबार सार्वजनिक गरेको हो ।
न्यूनतम सर्त तथा कार्यसम्पादन मापनका आधारमा स्थानीय निकायलाई बर्सेनी वरियताक्रममा राख्ने परम्पराले सकारात्मक प्रतिस्पर्धा बढाएको मन्त्रालयका सचिव महेन्द्र गुरुङले बताए । मन्त्रालयले वित्तीय आयोगमार्फत ११ वर्षदेखि सर्तमा आधारित थप अनुदानको समेत व्यवस्था गरेको छ । वित्तीय आयोगले सार्वजनिक गरेको विवरणअनुसार ८५ अंकका साथ बाँके र दैलेख जिविस दोस्रो भएका छन् भने ७५ अंक ल्याएर पाँचथर, कास्की र प्यूठान तेस्रो स्थानमा छन् । ३ हजार १ सय ५७ गाविसमध्ये ४ सय ६७ गाविसले न्यूनतम सर्त पालना गर्न सकेका छैनन् । ग्रामीण तहबाट सेवा प्रवाह गर्नुपर्ने निकायको यस्तो असफलताले स्वशासन र विकेन्द्रीकरणको अभ्यास सफल हुन नसकेको संकेत गर्छ । स्थानीय निकाय वित्तिय आयोगका सदस्य सचिव एवं मन्त्रालयका सहसचिव पुरुषोत्तम नेपालले असफल देखिएका स्थानीय निकाय सुधारका लागि विशेष पहल हुने बताए । सेवा प्रवाह, पारदर्शिता, वित्तीय व्यवस्थापन, राजस्व संकलन क्षमतालगायत सूचकांकका आधारमा वित्तीय आयोगले जिविस, नगरपालिका र गाविसको मूल्यांकन गर्छ ।
0 comments:
Post a Comment