इलाम, १७ पुषः स्थानीय तह चुनावपछि सामान्य संयोजनकारी भूमिकामा खुम्चिएको जिल्ला समन्वय समिति (जिसस) का कर्मचारीलाई कामको जिम्मेवारी नतोकिएकाले दिन कटाउनै मुस्किल हुन थालेको छ । जिससमा अहिले आठजनाको दरबन्दि कायम भएपनि कायम भएपनि निजामती, स्थानीय विकास र साविक जिविसका कर्मचारी सहित १७ जना कर्मचारी छन् ।
स्थानीय शासन सञ्चालन ऐनले स्थानीय तहलाई स्वायत्त बनाई जिससको भूमिकालाई खुम्च्याएपछि जिम्मेवारी विहीन जस्तै भएको जिल्ला समन्वय अधिकारी झरेन्द्र चापागाइँले बताउनुभयो । स्थानीय निकायबाट नियुक्ति पाएर कार्यक्रम हेर्ने कति कर्मचारी आएका छैनन्, आएका कर्मचारी पनि काम बिहिन् जस्तै बनेका छन् । प्रदेशसभा गठन र प्रदेश कानुन नभएको अवस्थामा कर्मचारीहरु भूमिका बिहन् नै बनेको चापागाइँको भनाई छ । अघिल्ला वर्षका क्रमागत ४÷५ वटा योजनाबाहेक कुनै कार्यक्रम नै नभएको उहाँले बताउनुभयो । जिससलाई संविधानले स्थानीय तह, प्रदेश र केन्द्र सरकारबीच समन्वय र स्थानीय तहका योजना अनुगमनको भूमिकामा सीमित गरेको छ ।
तर, स्थानीय शासन सञ्चालन ऐनले जिससलाई सामाजिक सुरक्षा, आन्तरिक आय, स्थानीय तहका विकास योजना अनुगमन गर्ने अधिकार भने दिएको छर । जिससमा निजामतितर्फ आठजना कर्मचारीको दरबन्दि भएपनि हाल तीनजना कर्मचारी मात्र कार्यरत छन् । कोष तथा लेखा नियन्त्रक कार्यालयबाट लेखापाल काजमा छन् भने प्राबिधिक तर्फको दरबन्दि पनि खालि छ । तर स्थानीय बिकास तर्फका ६ जना कर्मचारी भने कार्यरत नै रहेका छन् । सामान्य प्रशासन मन्त्रालयले कर्मचारी सरुवा भइसकेर रमाना लिएर गइसकेको जनाउँदै आएपनि सरुवा भएर आउने कर्मचारी हालसम्म नआइपुगेको जिल्ला समन्वय समिति इलामले जनाएको छ । चापागाइँका अनुसार साविक जिल्ला बिकास समितिका आठजना कर्मचारी पनि रहेका छन् । उनीहरुलाई स्थानीय निकायमा पठाउनका लागि मन्त्रालयबाट कामको जिम्मेवारी सहित कर्मचारीको संरचना नै नभएकाले समायोजन गर्न नसकेको बताइएको छ ।
शाखा अधिकृत लगायत पदका कर्मचारीलाई वडा कार्यलयमा नासु तथा खरदारको कामकाज गर्न पठाउन नसकिएकाले साबिक जिविसका आठ कर्मचारी पनि जिससमा कार्यरत रहेको चापागाइँले बताउनुभयो । स्थानीय तहको कर्मचारी संरचना बन्नसाथ ती कर्मचारी पनि समायोजन हुने बताइएको छ । एकातिर जिससमा डेढ दर्जन कर्मचारीको जिम्मेवारी नभएकाले कामविहीन छन्m अर्कातिर अधिकांश स्थानीय तहमा कर्मचारी अभाव छ । गाउँपालिकाहरूमा लेखापाल र प्राविधिकका दरबन्दीअनुसार कर्मचारी नहुँदा काम प्रभावित बन्दै गएका छन् ।
जिससमा रहेका कतिपय पद र दरबन्दी गाउँपालिका, नगरपालिकामा नभएकाले कर्मचारी व्यवस्थापनमा समस्या भएको बताइएको छ । चार नगरपालिका, ६ वटा गाउँपालिका र ८१ वटा वडा रहेको इलाममा अझैपनि २८ वटा वडामा खरीदार र नासु स्तरका कर्मचारी नै छैनन् । कर्मचारी अभावमा वडा सचिब आफैले सबै काम भ्याइरहेको र दुईवटा वडा सम्मको काम गर्न बाध्य भइरहेको जिल्ला समन्वय अधिकारी चापागाइँले बताउनुभयो । गाउँपालिका तथा नगरपालिकामा पनि आवश्यक मात्रामा कर्मचारी पूर्ती हुन सकिरहेको छैन ।