नमिन ढकाल
इलाम, १६ मंसिरः पछिल्लो समयमा नेपालमा एडस रोगीको संख्या घटदै गएता पनि इलाममा भने यो रोगबाट संक्रमित हुनेको संख्या बढदै गएको जिल्ला जनस्वास्थ्य कार्यालय इलामको तथ्याङकले देखाउछ । जिल्लामा हालसम्म १७ जना एडसका रोगी देखा परेका छन । आर्थिक वर्ष ०७०÷७१ मा १३५५ जनामा गरिएको परिक्षणमा २ जनामा एचआइभी पोजेटिभ देखिएको थियो । ०७१÷७२ मा १४२५ जनाको परिक्षणमा १ जना र ०७२÷७३ मा १५५८ जनाको परिक्षणबाट ८ जनामा एचआइभी पोजेटिभ देखिएको जिल्ला जनस्वास्थ्य कार्यालय इलामका सुचना अधिकारी टंक चौधरीले बताए । ३ वर्षको अवधिमा इलाममा एचआइभीबाट संक्रमित हुने ९ जना पुरुष र २ जना महिला रहेका छन । ०७०÷७१ भन्दा अघि जिल्लामा ६ जनामा एचआइभीको संक्रमण रहेको थियो । हालसम्म यस रोगबाट मृत्यु हुनेको विवरण जनस्वास्थ्य कार्यालयसँग नभएको चौधरीले बताए । वैदेशिक रोजगारीमा जानेका संख्या बढदै गएकाले पनि यो संख्या बढेको हुन सक्ने चौधरीले बताए । जिल्ला जनस्वाथ्य कार्यालय र इलाम अस्पतालतमा मात्र एडसको परिक्षण हुँदै आएकोमा गत वर्षदेखि फिक्कल र पशुपतिनगर स्वास्थ्य केन्द्र तथा यस वर्षदेखि प्याङ स्वास्थ्य केन्द्रमा एचआइभी परिक्षण सुरु भएपछि अब जिल्लाका ५ स्थानबाट एचआइभी परिक्षण हुने भएको छ । इलाम अस्पतालको स्वामित्वमा रहेको ए.आर.टी सेन्टरबाट नियमित १० जनाले निःशुल्क एचआइभी विरुद्धको औषधी सेवन गरिरहेको जिल्ला जनस्वास्थ्य कार्यालयले जनाएको छ । त्यस्तै, विश्व एडस दिवस इलाममा जनचेतनामुलक कार्यक्रम गरी मनाइएको छ । युवा सुचना केन्द्र इलामको आयोजनामा चोक बजारमा एडस सम्बन्धि जनचेतनामुलक सडक नाटक प्रर्दशन गरिएको छ ।
0 comments:
Post a Comment